April 17, 2018

សរុប​ព្រឹត្តិការណ៍​បុណ្យ​ចូលឆ្នាំ​បី​ថ្ងៃ​នៅ​ខេត្ត​បាត់ដំបង បន្ទាយមានជ័យ និង​ប៉ៃលិន

សកម្មភាព​ពលរដ្ឋ​លេង​ទឹក​តាម​ដង​ផ្លូវ​នៅ​សង្កាត់​ក្ដុលដូនទាវ ក្រុង​បាត់ដំបង ខេត្ត​បាត់ដំបង ថ្ងៃទី១៦ មេសា ឆ្នាំ​២០១៨។ Photo Provided

ដោយ ហេង សកល RFA 2018-04-16

សមត្ថកិច្ច​ខេត្ត​បាត់ដំបង និង​ខេត្ត​បន្ទាយមានជ័យ អះអាង​ថា ប្រជាពលរដ្ឋ​ដើរ​លេង​កម្សាន្ត​នៅ​តាម​រមណីយដ្ឋាន​សំខាន់ៗ​ក្នុង​ឱកាស​បុណ្យចូលឆ្នាំ​ប្រពៃណី​ខ្មែរ​រយៈពេល​២​ថ្ងៃ​កន្លងមក​មាន​ចំនួន​ច្រើន​កុះករ​ជាង​ឆ្នាំមុនៗ។ មូលហេតុ​ដែល​មាន​មនុស្ស​ច្រើន​នេះ ទំនង​ដោយសារ​អាជ្ញាធរ​ខេត្ត​ទាំង​២ បង្កើត​ពិធី​សង្ក្រាន្ត ស្វាគមន៍​ឆ្នាំ​ថ្មី ដើម្បី​ឲ្យ​ពលរដ្ឋ​រាំ​លេង​កម្សាន្ត​នៅ​ក្នុង​ខេត្ត​របស់​ខ្លួន។ ចំណែក​នៅ​ខេត្ត​ប៉ៃលិន​ឯណោះ​វិញ​ពលរដ្ឋ​អះអាង​ថា បុណ្យ​ប្រពៃណី​ជាតិ​ឆ្នាំនេះ មាន​អ្នកដើរ​លេង​តិច​ជាង​ឆ្នាំ​កន្លង​ទៅ។

ពលរដ្ឋ​នៅ​ជាប់​ព្រំដែន​ប្រទេស​ថៃ ខេត្ត​ប៉ៃលិន​លើកឡើង​ថា នៅ​តាម​ផ្ទះ​និង​តាម​ដង​ផ្លូវ​ក្នុង​ខេត្ត​នេះ​មាន​មនុស្ស​ធ្វើ​ដំណើរ​ជា​ធម្មតា ពោល​គឺ​មិន​ច្រើន​ដូច​នៅ​តាម​បណ្ដា​ខេត្ត​ផ្សេងៗ​នោះ​ទេ។

ពលរដ្ឋ​នៅ​ក្រុងប៉ៃលិន​លោក ឃឹម ប៉ុន អះអាង​ថា ក្នុង​ឱកាស​បុណ្យចូលឆ្នាំ​ប្រពៃណី​ជាតិ​ឆ្នាំនេះ លោក​មិនបាន​ទៅ​ដើរ​លេង​ឆ្ងាយ​ពី​ផ្ទះ​នោះ​ទេ គឺ​គ្រាន់តែ​បាន​ទៅ​ចូលរួម​ពិធី​បុណ្យ​សព​សាច់ញាតិ​នៅ​ឯ​ស្រុក​សំឡូត​ហើយក៏​ត្រឡប់​មក​ផ្ទះ​វិញ។ អតីត​ពលរដ្ឋ​តំបន់​ផ្ដាច់​ខ្លួន​រូប​នេះ​បន្ថែម​ថា បើទោះជា​លោក​មិនបាន​ដើរ​ទៅ​ណា​ឆ្ងាយ​ក្ដី ប៉ុន្តែ​លោក​សង្កេត​ឃើញ​ថា នៅ​តាម​ភូមិ​មាន​ប្រជាពលរដ្ឋ​ជួបជុំគ្នា​តាម​ផ្ទះ​តិច​ជាង​ឆ្នាំ​កន្លងទៅ ដែល​មាន​អ្នក​ធ្វើ​ដំណើរ​តាម​ដង​ផ្លូវ​ច្រើន​កុះករ​នោះ៖ «ពេល​ល្ងាច​ឃើញ​គេ​ជួប​ជុំ​គ្នា​តាម​ផ្លូវ​ម្ដុំ​មុខ​វត្ត​ភ្នំ​យ៉ាត​ដល់​មុខ​សណ្ឋាគារ​ចាស់​ក្រៅ​ពី​នេះ​មិន​ឃើញ​មាន​មនុស្ស​លែង​ទេ​។ និយាយ​រួម​ពី​មួយ​ទៅ​មួយ​ស្ងាត់​បន្តិច​ម្ដង​ៗ ខ្ញុំ​មើល​ទៅ​ប្រហែល​មក​ពី​ជីវភាព​ពួកគាត់​លំបាក​មិន​ប្រាក់​សម្រាប់​ដើរ​លែង​»។

លោក ឃឹម ប៉ុន បន្ថែម​ទៀត​ថា អាជ្ញាធរ​ខេត្ត​មួយ​នេះ​ក៏​មិនបាន​រៀបចំ​ពិធី​សង្ក្រាន្ត​ធំដុំ​អី​ដែរ គឺ​គ្រាន់​តែ​មាន​រៀបចំ​ពិធី​រាំ​លេង​នៅ​តាម​មន្ទីរ​នានា​បន្តិចបន្តួច​នៅ​ថ្ងៃ​ចូលឆ្នាំ​ដំបូង ហើយក៏​ស្ងាត់​ទៅវិញ។

ចំណែក​នៅ​ខេត្ត​បាត់ដំបង​ឯណោះ​វិញ មាន​ពលរដ្ឋ​ទៅ​លែង​កម្សាន្ត​ក្នុង​ឱកាស​បុណ្យចូលឆ្នាំ​ប្រពៃណី​ខ្មែរ​ច្រើន​កុះករ ជាពិសេស​នៅ​តាម​រមណីយដ្ឋាន​សំខាន់ៗ ដូចជា​នៅ​ប្រាសាទ​បាណន់ រមណីយដ្ឋាន​ទឹកធ្លាក់​ចម្ការ​ស្វាយ និង​រមណីយដ្ឋាន​ប្រាសាទ​ឯកភ្នំ​ជាដើម។

ស្នងការ​រង​នគរបាល​ខេត្ត​បាត់ដំបង លោក ជេត វណ្ណី មាន​ប្រសាសន៍​ថា ក្រៅ​អំពី​តំបន់​រមណីយដ្ឋាន​ទាំងនេះ​ហើយ ពលរដ្ឋ​ក៏បាន​នាំគ្នា​ទៅ​លេង​នៅ​ក្នុង​ពិធី​សង្ក្រាន្ត ដែល​រៀបចំ​នៅ​បរិវេណ​មុខ​វិទ្យាល័យ នេត យ៉ង់ ជាប់​រង្វង់​មូល​លោកតា​ដំបងក្រញូង យ៉ាង​ច្រើន​កុះករ​ដែរ។

លោក​អះអាង​ថា នៅ​ក្នុង​ពិធី​សង្ក្រាន្ត​នេះ មាន​ប្រដាល់​បុរាណ​ខ្មែរ មាន​ល្បែង​ប្រជាប្រិយ​ជាច្រើន​ប្រភេទ ព្រមទាំង​មាន​ឡានទឹក​ពន្លត់​អគ្គីភ័យ​របស់​ស្នងការ​នគរបាល​ខេត្ត​បាត់ដំបង​ចំនួន​៣​គ្រឿង​បាន​ដាក់​ប្រចាំការ សម្រាប់​បាញ់​ទឹក​ជូន​អ្នក​ចូល​រាំ​លេង​កម្សាន្ត​ជា​រៀងរាល់ថ្ងៃ​ទៀត​ផង។ លោក​ស្នង​រង​រូប​នេះ​បន្ថែម​ទៀត​ថា បុណ្យចូលឆ្នាំ​ខ្មែរ​ឆ្នាំនេះ មាន​មនុស្ស​មក​លេង​ក្នុង​ខេត្ត​នេះ​យ៉ាង​ច្រើន​កុះករ ហើយ​ពុំ​មាន​ក្រុម​ក្មេង​ទំនើង​បង្ក​បញ្ហា​ក្នុង​ពិធី​រាំ​លេង​នោះ​ទេ៖ «ក្នុង​ការ​ដើរ​លែង​ទាំង​គ្រោះថ្នាក់​ចរាចរ​ទាំង​ការ​អនុវត្ត ខ្ញុំ​គិត​ថា​បងប្អូន​មក​ដើរ​លែង​កម្សាន្ត​ ខាង​ខេត្ត​បាន​រៀបចំ​សណ្ដាប់ធ្នាប់ បាន​ដាក់​កម្លាំង​ការពារ​ជូន​ពលរដ្ឋ​ឲ្យ​ពួកគាត់​បាន​ធ្វើ​ដំណើរ​បាន​ស្រួល​ ហើយ​អ្នក​ទៅ​លេង​តាម​រមណីយដ្ឋាន​គឺ មិន​មាន​ភាព​រញ៉េរញ៉ៃ​ទេ»។

លោក ជេត វណ្ណី ឲ្យ​ដឹង​ទៀត​ថា រយៈពេល​២​ថ្ងៃ​គឺ​ចាប់ពី​ទី​១៤ ដល់ទី​១៥ មាន​ភ្ញៀវ ទេសចរណ៍​ជាតិ​និង​អន្តរជាតិ​ទៅលេង​កម្សាន្ត​នៅ​ក្នុង​ខេត្ត​មួយ​នេះ ចន្លោះ ប្រមាណ​ពី១៩ ទៅ ២៣​ម៉ឺន​នាក់ ហើយ​នៅ​ថ្ងៃ​ទី​១៦ មេសា លោក​ថា ក៏​នៅ​តែ​មាន​មនុស្ស​ទៅ​លេង​ច្រើន​កុះករ​ដូច​ថ្ងៃ​ដំបូង​ដែរ។

ទោះជា​យ៉ាង​នេះ​ក្ដី ចៅសង្កាត់​ព្រែកព្រះស្ដេច ជាប់ឆ្នោត​គណបក្ស​សង្គ្រោះជាតិ លោក ខាន់ ប៊ុនផែង មាន​ប្រសាសន៍​ថា ក្នុង​ឱកាស​បុណ្យចូលឆ្នាំ​ប្រពៃណី​ខ្មែរ​នេះ លោក​មិន​សប្បាយចិត្ត​នោះ​ទេ ហើយក៏​មិនបាន​ទៅ​ដើរ​លេង​ដូច​គេឯង​នោះ​ដែរ ព្រោះ​លោក​ខ្វល់ខ្វាយ​រឿង ដែល​របប​លោក​ហ៊ុន សែន ប្លន់​យក​អំណាច​ពី​លោក ដែល​ធ្វើ​ឲ្យ​លោក​បាត់បង់​ឱកាស​បម្រើ​ម្ចាស់​ឆ្នោត ខណៈ​ដែល​ពួកគាត់​កំពុង​តែ​មាន​កង្វល់ ហើយ​ត្រូវការ​លោក​ដើម្បី​ឲ្យ​ជួយ​ដោះស្រាយ​ជូន​ពួកគាត់​នោះ។

មន្ត្រី​គណបក្សប្រឆាំង​រូប​នេះ​អះអាង​ទៀត​ថា ពលរដ្ឋ​នៅ​តែ​មាន​កំហឹង​ចំពោះ​អ្នក​ដែល​ដក​លោក​ចេញពី​តំណែង​មិនទាន់​ឈប់​នៅឡើយ៖ «បើ​សិន​ជា​យើង​នៅ​ធ្វើ​ការ​ធម្មតា​មិន​អី​ទេ​​ដល់​គេ​ដក​ដំណែង​ដក​តួនាទី​ខ្ញុំ​អស់​រលីង​ គេ​បណ្ដេញ​​ខ្ញុំ​ចេញ​ពី​សាលា​សង្កាត់​មក​នៅ​ផ្ទះ​វិញ​ គឺ​មិន​ល្អ​ទេ។ចំណែក​ពលរដ្ឋ​វិញ​គាត់​ឈឺចាប់​កាន់​តែ​ខ្លាំង​ឡើង​ ព្រោះ​អី​បាត់បង់​អ្នក​ដែល​ពួកគាត់​បោះឆ្នោត​ឲ្យ​ ហើយ​ធ្វើ​ឲ្យ​ពួកគាត់​មាន​ការ​ខឹង​សម្បារ​កាន់​តែ​ខ្លាំង​ឡើង»។

រីឯ​ប្រធាន​មន្ទីរ​ទេសចរណ៍​ខេត្ត​បន្ទាយមានជ័យ​ឯណោះ​វិញ លោក ឈឿន សេរីវុធ មាន​ប្រសាសន៍​ថា បុណ្យចូលឆ្នាំ​ខ្មែរ​ឆ្នាំនេះ មាន​ភ្ញៀវ​ទេសចរណ៍​មកលេង​កម្សាន្ត​ខេត្ត​នេះ​ច្រើនជាង​ឆ្នាំ​មុនៗ ជាពិសេស​តំបន់​រមណីយដ្ឋាន កន្លែង​ប្រារព្ធ​ពិធី​សង្ក្រាន្ត នៅ​សួនច្បារ​ទី​រួម​ខេត្ត​បន្ទាយមានជ័យ និង​ក្រុង​ប៉ោយប៉ែត​ជាដើម។ លោក ឈឿន សេរីវុធ អះអាង​ទៀត​ថា នៅ​ថ្ងៃ​ទី​១៦ មេសា ប្រជាពលរដ្ឋ​បន្ត​ទៅ​លែង​កម្សាន្ត​នៅ​ប្រាសាទ​បន្ទាយឆ្មារ និង​នៅ​អាង​ត្រពាំងថ្ម ក្នុងស្រុក​ភ្នំស្រុក យ៉ាង​ច្រើន​កុះករ៖ «អូ!ខុស​គ្នា​ច្រើន​២ថ្ងៃ​បើ​នៅ​សួន​មានជ័យ​ខុស​ច្រើន​មែនទែន​ ព្រោះ​មាន​មនុស្ស​មក​លេង​ប្រមាណ​ជាង​២ម៉ឺន​នាក់​ក្នុង​មួយ​ថ្ងៃ​ ចំណែក​ប្រាសាទ​បន្ទាយឆ្មារ​២ថ្ងៃ​កន្លង​មក​មិន​សូវ​មាន​មនុស្ស​ទេ​ ប៉ុន្តែ​ថ្ងៃ​ទី​១៦ មេសា មាន​មនុស្ស​មក​លង​ច្រើន​កកកុញ​តែ​ម្ដង​ ហើយ​មក​លែង​ភាគ​ច្រើន​ភ្ញៀវ ជាតិ​មក​ពី​ខេត្ត​ជិត​ខាង​ផង និង​អ្នក​នៅ​ខេត្ត​បន្ទាយមានជ័យ​ផង»។

ទោះជា​យ៉ាងណា​ក៏​ដោយ​ចុះ មន្ត្រី​ស្រាវជ្រាវ​អង្គការ​លីកាដូ (Licadho) ខេត្ត​បាត់ដំបង លោក យ៉ាត កម្សាន្ត កត់សំគាល់​ថា បុណ្យចូលឆ្នាំ​ប្រពៃណី​ខ្មែរ​ឆ្នាំនេះ មាន​ពលរដ្ឋ​ទៅ​លេង​កម្សាន្ត​នៅ​តាម​រមណីយដ្ឋាន​ច្រើនជាង​ឆ្នាំ​កន្លងទៅ​ក៏​ពិតមែន ក៏ប៉ុន្តែ​លោក យ៉ាត កម្សាន្ត ថា អាជ្ញាធរ​ហាក់​មិនបាន​រៀបចំ​សមត្ថកិច្ច​ប្រចាំការ​នៅ​តាម​ដង​ផ្លូវ ដើម្បី​ជួយ​សម្រួល​ដល់​អ្នក​ធ្វើ​ដំណើរ​នោះ​ទេ។ លោក​អះអាង​ទៀត​ថា អ្នក​ធ្វើ​ដំណើរ​តាម​ដង​ផ្លូវ​ប្រឈម​នឹង​គ្រោះថ្នាក់​ដល់​អាយុជីវិត​ជាង​ឆ្នាំ​មុនៗ ព្រោះ​បើកបរ​ភាគច្រើន​ប្រជែង​គ្នា​តាម​ដង​ផ្លូវ​ដូច​គោ ហ្វូង ជាពិសេស​ក្រុម​យុវជន​បើកបរ​ម៉ូតូ​តែម្ដង។ «»

របាយការណ៍​ក្រសួងទេសចរណ៍​បង្ហាញ​ឲ្យ​ដឹង​ថា ភ្ញៀវទេសចរ​ជាតិ​-​អន្តរជាតិ​ទៅ​កម្សាន្ត ក្នុង​ព្រឹត្តិការណ៍​អង្គរ​សង្ក្រាន្ត​ពី​ថ្ងៃ​ទី១៣ ដល់​ថ្ងៃទី​១៤ មេសា ជាង​៦៦​ម៉ឺន​នាក់ កើន ជាង​២៩ បើ​ធៀប​នឹង​ឆ្នាំ​២០១៧ មាន​ជាង ៥១​ម៉ឺន​នាក់ (៥១០,០០០) ក្នុង​​​​​​​​​​​​​នោះ​ភ្ញៀវ​ជាតិ ប្រមាណ ៦៥​ម៉ឺន​នាក់​គឺ​កើន​ឡើង​៣០​ភាគរយ បើ​ប្រៀប​នឹង​ឆ្នាំ​២០១៧ ដែល​មាន​ប្រមាណ ៥០​ម៉ឺន​នាក់ ហើយ​ភ្ញៀវ​អន្តរជាតិ​ជាង ១​ម៉ឺន​៣​ពាន់ (១៣.០៣៦) កើន​ឡើង ០.០៣​ភាគរយ ធៀប​នឹង​ឆ្នាំ​២០១៧ ដែល​មាន​ចំនួន ១​ម៉ឺន ៣​ពាន់​នាក់​(១៣,០៣២)​នាក់។

របាយការណ៍​ឲ្យ​ដឹង​ទៀត​ថា បុណ្យចូលឆ្នាំ​ថ្ងៃ​ដំបូង មាន​ភ្ញៀវ​ទេសចរ​ទៅ​កម្សាន្ត​នៅ​តាម​រមណីយដ្ឋាន​ទូទាំង​ប្រទេស សរុប​ជាង ១​លាន​នាក់ (១,០៨០,០០០) គឺ​កើន​ឡើង​ប្រមាណ ២៦​ភាគរយ ក្នុង​នោះ​ភ្ញៀវ​ជាតិប្រមាណ ១​លាន​នាក់ (១,០៥៦,០០០) កើន​ឡើង​ជាង ២៨​ភាគរយ ហើយ​ភ្ញៀវ​អន្តរជាតិ​ប្រមាណ ២​ម៉ឺន ៤​ពាន់​នាក់ (២៤,០០០) កើន​ឡើង​ជាង ២១​ភាគរយ៕

No comments: