September 13, 2017

សហរដ្ឋអាមេរិក​ឈប់​ផ្ដល់​ទិដ្ឋាការ​ឲ្យ​មន្ត្រី​ក្រសួង​ការបរទេស​កម្ពុជា

គេហទំព័រ​ស្ថានទូត​សហរដ្ឋ​អាមេរិក ប្រចាំ​កម្ពុជា។ Screenshot

ដោយ ម៉ម មុនីរតន៍ RFA 2017-09-13

សហរដ្ឋអាមេរិក សម្រេច​មិន​ផ្ដល់​ទិដ្ឋាការ​ទៅ​ដល់​មន្ត្រី​បម្រើការ​នៅ​ក្នុង​ក្រសួង​ការបរទេស​កម្ពុជា និង​សាច់ញាតិ នៅ​ពេល​ចង់​ទៅ​សហរដ្ឋអាមេរិក។ ការ​ប្រកាស​ជំហរ​ដូច​នេះ ស្រប​ពេល​ដែល​រដ្ឋាភិបាល​កម្ពុជា និង​សហរដ្ឋអាមេរិក កាន់​តែ​ឈាន​ទៅ​រក​ភាព​ប្រេះឆា​ផ្នែក​ចំណង​ការទូត​មួយ​រយៈពេល​ចុង​ក្រោយ​នេះ។

មក​ដល់​ពេល​នេះ ក្រសួង​ការបរទេស​កម្ពុជា បន្ត​ស្ថិត​នៅ​ក្នុង​ភាព​ស្ងប់ស្ងាត់​នៅ​ឡើយ ចំពោះ​ការ​ព្រមាន​របស់​សហរដ្ឋអាមេរិក ដែល​ប្រកាស​បិទ​ទិដ្ឋាការ​មន្ត្រី​របស់​ខ្លួន​ចូល​ប្រទេស​មហា​អំណាច​មួយ​នេះ។

សេចក្ដី​ថ្លែងការណ៍​របស់​ស្ថានទូត​អាមេរិក ប្រចាំ​នៅ​កម្ពុជា នៅ​ថ្ងៃ​ទី​១៣ ខែ​កញ្ញា បាន​សរសេរ​ថា សហរដ្ឋអាមេរិក សម្រេច​ផ្អាក​មិន​ផ្ដល់​ទិដ្ឋាការ​ទៅ​ដល់​មន្ត្រី​បម្រើការ​នៅ​ក្នុង​ក្រសួង​ការបរទេស ចាប់​ពី​ថ្ងៃ​ទី​១៣ ខែ​កញ្ញា នេះ​ទៅ។ ប្រភព​បន្ត​ថា សេចក្ដី​សម្រេច​នៃ​ការ​បិទ​ទិដ្ឋាការ​នេះ គឺ​រាប់​ចាប់​ពី​ថ្នាក់​អគ្គនាយក រហូត​ដល់​មន្ត្រី​កំពូលៗ​របស់​ក្រសួង​ការបរទេស​កម្ពុជា រួម​ទាំង​សមាជិក​សាច់ញាតិ​ផង។ ប៉ុន្តែ​ការ​ព្រមាន​ផ្អាក​ផ្ដល់​ទិដ្ឋាការ​របស់​សហរដ្ឋអាមេរិក មក​លើ​កម្ពុជា នេះ នឹង​មិន​ប៉ះពាល់​ចំពោះ​ពលរដ្ឋ​កម្ពុជា នោះ​ទេ។

បើ​ទោះ​ជា​បែប​ណា មក​ដល់​ពេល​នេះ ពុំ​មាន​ប្រតិកម្ម​ណា​មួយ​ពី​មន្ត្រី​របស់​ក្រសួង​ការបរទេស​កម្ពុជា ​នៅ​ឡើយ​នោះ​ទេ ចំពោះ​ការ​ព្រមាន​របស់​សហរដ្ឋអាមេរិក​នេះ។

អាស៊ីសេរី ព្យាយាម​សុំ​ការ​បំភ្លឺ​ជា​ច្រើន​ដង​តាម​ទូរស័ព្ទ​ពី​អ្នក​នាំ​ពាក្យ​ក្រសួង​ការបរទេស​កម្ពុជា ប៉ុន្តែ​ពុំ​មាន​អ្នក​ទទួល​នៅ​ថ្ងៃ​ទី​១៣ ខែ​កញ្ញា។
យ៉ាង​ណា​ក៏​ដោយ ការ​ព្រមាន​របស់​សហរដ្ឋអាមេរិក​លើក​នេះ ពុំ​បាន​បញ្ជាក់​ឲ្យ​លម្អិត​ថា​តើ​ផ្ដើម​ចេញ​ពី​មូលហេតុ​អ្វី​ឲ្យ​ប្រាកដ​នៅ​ឡើយ​ទេ។ ប៉ុន្តែ​គេ​ដឹង​ថា ការ​ព្រមាន​របស់​ស្ថានទូត​ប្រទេស​មហា​អំណាច​មួយ​នេះ ទំនង​ទាក់ទិន​រដ្ឋាភិបាល​កម្ពុជា បដិសេធ​មិន​ទទួល​យក​ពលរដ្ឋ​ខ្មែរ​មាន​សញ្ជាតិ​អាមេរិក ដែល​ប្រព្រឹត្ត​កំហុស​លើ​ទឹកដី​ប្រទេស​នេះ ហើយ​ត្រូវ​បញ្ជូន​ត្រឡប់​មក​កម្ពុជា។

អ្នក​វិភាគ​នយោបាយ​យល់​ឃើញ​ថា ការ​ព្រមាន​តាម​របៀប​ការទូត​របស់​សហរដ្ឋអាមេរិក​នេះ នឹង​ជា​ការ​បង្ហាញ​សាច់ដុំ​ឲ្យ​រដ្ឋាភិបាល​ឃើញ​ពី​ភាព​ខ្លាំង​របស់​ខ្លួន។

លោក​បណ្ឌិត មាស នី អ្នក​ស្រាវជ្រាវ​ការ​អភិវឌ្ឍ​សង្គម យល់​ឃើញ​ថា ការ​ខ្វែង​គំនិត​លើ​ទិដ្ឋភាព​នយោបាយ​រវាង​សហរដ្ឋអាមេរិក និង​កម្ពុជា ចៀស​មិន​ផុត​ពី​ផល​អាក្រក់​ចំពោះ​រដ្ឋាភិបាល​ឡើយ។ ជាង​នេះ​ទៀត ជំហរ​របស់​សហរដ្ឋអាមេរិក​នេះ ជា​សម្ពាធ​កាន់​តែ​ខ្លាំង​ដល់​រដ្ឋាភិបាល ទាំង​នៅ​ក្នុង​តំបន់ និង​លើ​ឆាក​អន្តរជាតិ ជាពិសេស​ប៉ះពាល់​មុខមាត់ និង​កិត្យានុភាព​របស់​កម្ពុជា៖ «»។

មួយ​រយៈពេល​ចុង​ក្រោយ​នេះ ទំនាក់ទំនង​រវាង​សហរដ្ឋអាមេរិក និង​រដ្ឋាភិបាល​កម្ពុជា កាន់​តែ​មាន​ភាព​ល្អក់កករ និង​តានតឹង​ឡើងៗ។ លោក​នាយករដ្ឋមន្ត្រី ហ៊ុន សែន ចោទ​ប្រកាន់​សហរដ្ឋអាមេរិក​ថា ជា​បាតដៃ​ទី៣ និង​ជា​អ្នក​ស្ថិត​នៅ​ពីក្រោយ​នៃ​នយោបាយ​បដិវត្តន៍​ពណ៌​របស់​បក្ស​ប្រឆាំង។

ជុំវិញ​រឿង​នេះ ស្ថានទូត​អាមេរិក​ប្រចាំ​កម្ពុជា បាន​ចេញ​មុខ​បញ្ជាក់​ជំហរ និង​ភាព​ស្អាតស្អំ​របស់​ខ្លួន​ជា​ញឹកញាប់​ថា បេសកកម្ម​របស់​សហរដ្ឋអាមេរិក នៅ​កម្ពុជា​នេះ មិន​បង្ក​ជម្លោះ​នោះ​ឡើយ។

សហរដ្ឋអាមេរិក បាន​ប្រតិកម្ម​ទាំង​តាម​សេចក្ដី​ថ្លែងការណ៍ និង​សម្ដី​ផ្ទាល់​របស់​ឯកអគ្គរដ្ឋទូត​សហរដ្ឋអាមេរិក ប្រចាំ​កម្ពុជា លោក វីល្លៀម ហៃដ្ត (William Heidt) ដោយ​បាន​ហៅ​ការ​ចោទ​ប្រកាន់​របស់​រដ្ឋាភិបាល​កម្ពុជា ប្រឆាំង​សហរដ្ឋអាមេរិក​ថា ជា​រឿង​ដែល​ឈឺ​ចាប់ និង​ភ្ញាក់ផ្អើល។ មិន​តែ​ប៉ុណ្ណោះ ការ​ចោទ​ប្រកាន់​នេះ​គឺ​សុទ្ធ​តែ​ខុស​ទាំងអស់។

អ្នក​វិភាគ​នយោបាយ​យល់​ឃើញ​ថា ការ​អួតអាង​របស់​លោក​នាយករដ្ឋមន្ត្រី ហ៊ុន សែន ដែល​មាន​ចិន នៅ​ពី​ក្រោយ​ខ្នង​នេះ អាច​ជា​រឿង​ខក​ចិត្ត​ទៅ​វិញ​ទេ ព្រោះ​សេដ្ឋកិច្ច និង​ទីផ្សារ​ធំ​របស់​កម្ពុជា គឺ​សហគមន៍​អឺរ៉ុប និង​សហរដ្ឋអាមេរិក មិន​មែន​ចិន​ឡើយ៕

2 comments:

sam said...


“សហរដ្ឋអាមេរិកឈប់ផ្ដល់ទិដ្ឋាការឲ្យមន្ត្រីក្រសួងការបរទេសកម្ពុជា = The United States stopped issuing visas to Cambodian Foreign Ministry officials.”

Is this the first step toward breaking the diplomatic tie?



tk said...

If Hun Sen preferred to be close to China and acted again the United States I don't think the U.S. should continue to have relationship with Cambodia anyway. It looks like history repeat itself. In 1968 Sihanouk did the same thing: aligned himself with China and kicked American out. By aligning with China, Cambodia lost mountains, forests, our resources to Chinese companies which resulted in Khmer population without land to live on. The same thing happened in the 1975-78 during Pol Pot's rule. China at that time took away rice from us while the entire Khmer population starved to death. We, Khmer never learned lesson from the past.